رياست جي رٽ قائم ڪرڻ کانسواءِ انتهاپسندي مان ڇوٽڪارو ممڪن نه آهي: چوڌري فواد حسين

اسلام آباد – 18 – نومبر (اي پي پي) اطلاعات ۽ نشريات واري وفاقي وزير چوڌري فواد حسين چيو آهي ته رياست جي رٽ قائم ڪرڻ کانسواءِ انتهاپسندي مان ڇوٽڪارو ممڪن نه آهي، موقف پيش ڪرڻ هر هڪ جو حق آهي جڏهن ته ان کي زبردستي مڙهڻ صحيح نه آهي، اسان شدت پسندي سان دنيا کي تباهه ٿيندي ڏٺو آهي، شدت پسندي هن وقت ٻيو وڏو مسئلو آهي، اسان کي ڀارت کان ڪو خطرو نه آهي، اسان جي فوج دنيا جي ڇهين وڏي فوج ۽ اسان ائٽمي طاقت آهيون، ڀارت اسان جو مقابلو نه ٿو ڪري سگهي، اسلام اعتدال ۽ امن جو درس ڏي ٿو، جيڪو شخص سيرت النبي ﷺ کي سمجهي ٿو اهو ڪيئن شدت پسند ٿي سگهي ٿو؟ اهڙن خيالن جو اظهار هن پاڪستان انسٽيٽيوٽ آف پيس اسٽڊيز جي اهتمام هيٺ تقريب کي خطاب ڪندي ڪيو. چوڌري فواد حسين چيو ته قانون جي عملداري يقيني بڻائڻ رياست جي ذميواري آهي، رياست جو ڪنٽرول ختم ٿيو ته جٿا قانون پنهنجي هٿ ۾ کڻي وٺن ٿا. هن چيو ته حڪومت ۽ رياست شدت پسندي جو مقابلو ڪرڻ جي لاءِ مڪمل طور تي تيار آهي. اطلاعات واري وفاقي وزير چيو ته پاڪستان صوفين جي سرزمين ۽ درگاهن جو مسڪن هو، هتي هڪ ٻئي کي مڃي هلڻ وارا ماڻهو هئا، ٽي سئو سال اڳ جو پنجاب ۽ خيبرپختونخواهه ڏسو ته هتي مذهبي شدت پسندي ڪڏهن نه هئي. هن چيو ته ڪجهه سياسي سببن جي ڪري هتي اهڙو عنصر پيدا ٿيو جنهن جي نتيجي ۾ پاڪستان ان وڏي خطري ۾ وٺجي ويو آهي. هن چيو ته ماضي ۾ اسڪولن ۽ ڪاليجن ۾ اهڙا استاد ڀرتي ٿيا جن انتهاپسندي کي فروغ ڏنو. اطلاعات واري وفاقي وزير چيو ته اسلام اعتدال ۽ امن جو درس ڏي ٿو، جيڪو شخص سيرت النبي ﷺ کي سجهي ٿو اهو ڪيئن شدت پسند ٿي سگهي ٿو؟ چوڌري فواد حسين چيو ته نرم روين جي لاءِ ماحول جي ضرورت آهي جيڪڏهن اسان ماحول نه ٿا ڏئي سگهون، عام ماڻهو جي زندگي جو تحفظ نه ٿا ڪري سگهون، ڪو ٻيو موقف نه ٿو اچي سگهي ته سافٽ چينج ڪيئن ممڪن آهي؟ هن چيو ته مولانا حسن جان کي اها فتويٰ ڏيڻ تي شهيد ڪيو ويو ته خودڪش حملو اسلام ۾ جائز نه آهي. هن چيو ته اسلام جي تبليغ توازن تي ٻڌل آهي، اسلامي تعليم جي تشريح ڪندڙ فيصلو ڪن ٿا ته ڪهڙي فلسفي جي ڪهڙي تعبير ٿيندي. هن چيو ته برطانيا مقامي لاء انفورسمنٽ نظام قائم ڪيو هو، اسان اهو نظام ته ختم ڪري ڇڏيو پر ان جو متبادل نظام نه آڻي سگهياسين، ان نظام جا ٽي وڏا ٿنڀ چوڪيدار، نمبردار ۽ ٿاڻيدار هئا، نمبردار جو انسٽيٽيوشن ختم ٿيڻ سان چوڪيدار جو نظام ختم ٿي ويو. اطلاعات واري وفاقي وزير چيو ته پاڪستان جي تاريخي ڏٺي وڃي ته ڳالهيون وزيراعظم يا گهرو وزير نه پر ٿاڻيدار ڪندو هو. هن چيو ته جيڪا رياست قانون جي عملداري نه ڪرائي سگهي، ان جي بقاءَ تي تمام جلد سوال اٿن ٿا. اطلاعات واري وفاقي وزير چيو ته موقف جو فيصلو سوسائٽي کي ڪرڻو آهي. جيستائين اسان قانون جي عملداري کي يقيني نه بڻائينداسين ۽ رياست جي رٽ قائم نه ڪنداسين، شدت پسندي جي لاءِ ڪو نرم رويو نه ٿو اچي سگهي.

مضمون کا ماخذ : لاٹری ٹکٹ خریدیں

متعلقہ مضامین