اسلام آباد ۔ 10 جون (اے پی پی) شہری ہوا بازی دے وفاقی وزیر غلام سرور خان آکھیا جو کراچی طیارہ حادثے سودھا ماضی اچ تھیونڑ آلے بئے حادثیاں دی رپورٹ 22جون کوں قومی اسمبلی اچ پیش کر ڈتی ویسی،کراچی طیارہ حادثہ کیس دی شفاف تحقیقات سانگے ترکی اتے بئی عالمی شہرت یافتہ ایئر لائنز دے ایئر بس دے سینئر ترین پائلٹس وی تحقیقاتی ٹیم اچ شامل کیتے گئن، 56800توں ودھ باہرلے ملک پھتے پاکستانیاں کوں وطن واپس گھن آیوں،ماضی اچ پائلٹاں دے جعلی لائسنس وی حاصل کیتے گئن،ایندی پوری تحقیقات کرائی ویسی،پی آئی اے دے روز ویلیٹ ہوٹل اتے ہوائی اڈیاں کوں آﺅٹ سورس کرنڑ بارے شفاف طریقہ کیتا ویسی،شفاف تحقیقات کر تے ذمہ واریاں دا تعین کیتا ویسی۔بدھ کوں قومی اسمبلی اچ پالیسی بیان ڈیندیں ہوئیں وفاقی وزیر آکھیا جو کراچی طیارہ حادثہ اچ 82ٹبراں کوں ڈاہ ڈاہ لکھ روپے ڈتے گئن۔جہاز ڈہونڑ نال 16مکان برے طریقے نال متاثر تھین۔اللہ انہاں گھراں اچ رہنڑ آلیاں دی جاناں محفوظ رکھین۔ترائے بالڑیاں ملبے تلوں آکراہیں زخمی تھیاں۔ہک بالڑی جاں بحق تھئی ،انہاں کوں وی زر اعانت ڈتی گئی اے۔انہاں لوکاں کوں یقین ڈوایا جو لوکاں دے ضیان دا پی آئی اے،سول ایوی ایشن اتے صوبائی حکومتاں دے اداریاں دے ذریعے سروے تھیندا پئے ۔انہاں آکھیا جو حادثہ کوئی وی تھیے انہاں دے ذمہ واراں دا تعین بہوں ضروری اے۔اے حادثے اساڈے سانگے ندامت ہن ۔اساں سارے ایں دے ذمہ وار ہیسے۔میں یقین ڈوینداں جو 22جون کوں کراچی طیارہ حادثے سودھا ماضی قریب اچ تھیونڑ آلے پنج حادثیاں دی رپورٹ ایوان اچ پیش کریسوں۔
