بلوچستان اچ مینھ تے سیلاب پاروں 254 لوک جاں بحق، 61 ہزارمکان تباہ

کوئٹہ۔31اگست (اے پی پی):پی ڈی ایم اے آکھیے جو بلوچستان اچ ساوݨ دے طوفانی مینھ تے سیلابی صورتحال توں 254 بندے جاں بحق اتے 61 ہزار تں ودھ مکان تباہ تھی ڳئن، جانی و مالی ضیان دے حوالے نال رپورٹ جاری کرݙتی ڳئی اے ،ادارے دے ترجمان دی طرفوں جاری رپورٹ موجب صوبے اچ مزید 4 بندے جان دی بازی ہار ڳئن، بلوچستان اچ جون توں ہݨ تئیں مینھ پاروں 254 لوک جاں بحق تھئن جنہاں اچوں 121 مرد، 59 تریمتاں تے 73 ٻال شامل ہن، زیادہ اموات کوئٹہ، بولان، ژوب، کیچ، دکی، خضدار، کوہلو، مستونگ، ہرنائی، قلعہ سیف اللہ اتے سبی اچ تھئن ،مختلف حادثیں اچ 164 لوک زخمی وی تھئن۔رپورٹ اچ آکھیا ڳئے جو مینھ پاروں 61 ہزار 718 مکاناں کوں وی ضیان تھئے جنہاں اچوں 17 ہزار 608 ڈھہہ ڳئن تے 44 ہزار 110 کوں جزوی ضیان پڄے ، سیلابی صورتحال پاروں صوبے دے وکھرے علاقیں اچ 18 پل اتے 1000 کلو میٹرسڑکاں کوں ضیان تھئے ۔رپورٹ موجب ھک لکھ 45 ہزار 936 مال ڈھور مرئن جݙاں جو 2 لکھ ایکڑ توں ودھ رقبے تے فصلاں دا وی ضیان تھئے ، متاثرہ ضلعیں اچ پی ڈی ایم اے دیاں امدادی سرگرمیاں جاری ہن ۔

مضمون کا ماخذ : فا فا فا ۔

متعلقہ مضامین