اسلام آباد – 21 – جون (اي پي پي) وزيراعظم محمد شهباز شريف سي پيڪ تي پاڪستان ۽ چين جي وچ ۾ مڪمل سياسي اتفاق راءِ تي اطمينان ظاهر ڪندي چيو آهي ته پاڪ چين دوستي ٻنهي ملڪن سان گڏوگڏ خطي ۽ عالمي امن ۽ ترقي جي لاءِ لازمي آهي، خصوصي سيڙپڪاري سهولت ڪائونسل ملڪ ۾ چيني سيڙپڪاري جي حوالي سان هر ممڪن سهولتون فراهم ڪري رهي آهي جڏهن ته ڪميونسٽ پارٽي آف چائنا جي عالمي ترقي واري وزير ليو جيان چائو چيو ته چين پاڪستان جي اقتصادي ترقي جي حمايت جاري رکندو ۽ سي پيڪ جي اپ گريد ورزن جي لاءِ گڏيل طور تي ڪم ڪندو. وزيراعظم آفيس جي ميڊيا ونگ پاران جاري بيان موجب وزيراعظم محمد شهباز شريف سان ڪميونسٽ پارٽي آف چائنا جي عالمي ترقي واري وزير ليو جيان چائو اسلام آباد ۾ ملاقات ڪئي. ليو جيان چائو وزيراعظم جي چين جي تازي دوري کانپوءِ ٿيندڙ اڳڀرائي جو حصو آهي. چيني وزير ۽ ان جي وفد جي ميمبرن جي پاڪستان ۾ آجيان ڪندي وزيراعظم انهن کي ۽ پاڪستان جي سياسي اڳواڻن کي پاڪ چين پوليٽيڪل پارٽيز فورم جي ڪامياب تنظيم ۽ سياسي پارٽين جي گڏيل مشاورتي مڪينزم (جي سي ايم) جي ٽئين دور تي مبارڪباد ڏني. چين پاڪستان اقتصادي لنگهه جي حوالي سان هن چيو ته اها انتهائي اطمينان جوڳي ڳالهه آهي ته چين پاڪستان اقتصادي لنگهه تي ٻنهي ملڪن ۾ مڪمل سياسي اتفاق راءِ آهي. هن وڌيڪ چيو ته اسان بزنس ٽو بزنس ۽ صنعتي شعبن تي ڌيان ڏيندي چين پاڪستان اقتصادي لنگهه جو نئون مرحلو شروع ڪرڻ جي لاءِ تيار آهيون. ٻنهي ملڪن جي وچ ۾ ٻطرفن لاڳاپن جي تاريخي ۽ منفرد اهميت تي زور ڏيندي وزيراعظم چيو ته پاڪ چين دوستي وقت جي هر آزمائش تي پورو لٿي آهي. هن پاڪ چين دوستي کي ٻنهي ملڪن سان گڏوگڏ خطي ۽ عالمي امن ۽ ترقي جي لاءِ لازمي قرار ڏنو. پنهنجي چين جي تازي دوري دوران چيني صدر شي جن پنگ ۽ وزيراعظم لي ڪي ڪيانگ سان ٿيندڙ لاڀائتين ملاقاتن جو ذڪر ڪيو ۽ پاڪ چين اسٽريٽجڪ لاڳاپن ۾ مسلسل بهتري ۽ چين پاڪستان اقتصادي لنگهه جي اڳئين مرحلي ۾ ان لنگهه جي اپ گريڊيشن جي لاءِ گڏجي ڪم ڪرڻ جي چيني قيادت جي ويزن کي ساراهيو. وزيراعظم ان ڳالهه تي زور ڏنو ته سي پيڪ جي سمورن جاري ۽ نئين منصوبن جي جلد تڪميل ۽ انهن تي عملدرآمد پاڪستان جي اقتصادي ترقي ۽ جامع ترقي ۾ اهم ڪردار ادا ڪندو. وزيراعظم ٻنهي ملڪن جي سياسي پارٽين جي وچ ۾ تجربي جي مٽاسٽا، صلاحيت ۾ بهتري جي حوالي سان مٽاسٽا جي اهميت تي زور ڏنو. هن پاڪستان سان چين جي مضبوط ڀائيچاري کي وڌيڪ مضبوط بڻائڻ جي لاءِ سي پي سي جي مڪمل حمايت کي ساراهيو. ليو جيان چائو ان ڳالهه تي زور ڏنو ته پاڪستان ۽ چين مضبوط ڀاءُ، اسٽريٽجڪ حصيدار ۽ انتهائي اعتماد جوڳا دوست آهن. هن چيو ته چين پنهنجي پرڏيهي پاليسي ۾ پاڪستان کي هڪ خاص مقام ڏنو آهي ۽ هو پاڪستان جي اقتصادي ترقي جي حمايت جاري رکندو ۽ سي پيڪ جي اپ گريڊ ورزن جي لاءِ گڏيل طور تي ڪم ڪندو. هن چيو ته وزيراعظم محمد شهباز شريف جو چين جو دورو انتهائي ڪامياب رهيو. سندس چوڻ هو ته اسان چين پاڪستان اقتصادي لنگهه جي اڳئين مرحلي جي لاءِ تيار آهيون. وفد ۾ پاڪستان ۾ مقرر چيني سفير جيانگ زيڊونگ شامل هو، ملاقات ۾ بنهي ملڪن جي وچ ۾ گورنمينٽ ٽو گورنمينٽ ۽ بزنس ٽو بزنس حصيداري وڌائڻ تي اتفاق ڪيو ويو، ملاقات ۾ نائب وزيراعظم ۽ پرڏيهي وزير اسحاق ڊار، ٻيا وفاقي وزير ۽ چيف آف آرمي اسٽاف جنرل سيد عاصم منير پڻ موجود هئا. ان موقعي تي وزيراعظم محمد شهباز شريف وفد جي اعزاز ۾ آجياڻو پڻ ڏنو. جنهن ۾ مختلف سياسي پارٽين جي قائدين پڻ شرڪت ڪئي.
