اسلام آباد۔17جون (اے پی پی):وزیر اعظم عمران خان پاݨی دی کمی تے وݙے شہراں اچ ویسٹ واٹر ٹریٹمنٹ پلانٹس دی اہمیت تے زور ݙیندے ہوئیں آکھیے جو پاݨی دی گھٹکی کوں پورا کرݨ تے واٹر ٹریٹمنٹ پلانٹس کیتے جدید ٹیکنالوجی دا استعمال ناگزیر اے۔ وزیر اعظم آفس دے میڈیا ونگ توں جاری بیان موجب اے ڳال انہاں خمیس کوں راوی اربن سٹی اتے سنٹرل بزنس ڈسٹرکٹ منصوبے تے پیش رفت دے حوالے نال اجلاس دی صدارت کریندے ہوئیں آکھی اے ۔ اجلاس اچ وزیر خزانہ شوکت ترین ، معاون خصوصی ڈاکٹر شہباز گل، چیئرمین نیا پاکستان ہاؤسنگ اتھارٹی لیفٹیننٹ جنرل(ر) انور علی حیدر، سی ای او راوی اربن ڈویلپمنٹ اتھارٹی عمران امین، وائس چیئرمین ایل ڈی اے ایس ایم عمران اتے سینئر افسران شریک ہن ۔اجلاس اچ انہاں ݙوہیں کلیدی منصوبیں اچ تھیوݨ آلی پیش رفت تے تفصیلی بریفنگ ݙتی ڳئی ۔اجلاس کوں ݙسایا ڳیا جو سیفائر۔بے اچ ترقیاتی کم اڳلے ہفتے کنٹریکٹ دے اجراء دے بعد وختی شروع کرݙتا ویسی ۔انڈسٹریل زون دے حوالے نال منظوری دا عمل وی جون اچ مکمل تھی ویسی جیں توں بعد انفراسٹرکچر دی تعمیر دا کم شروع کرݙتا ویسی۔ راوی سٹی اچ اقرا یونیورسٹی، UMT اتے ISC اپݨے کیمپسز قائم کریسن ۔ اقرا یونیورسٹی اپݨے کیمپس دے نال نال ہسپتال دی تعمیر اچ وی دلچسپی ظاہر کیتی اے ۔ اجلاس کوں راوی سٹی اچ واسا دے ترائے واٹر ٹریٹمنٹ پلانٹس دی منتقلی اتے ویسٹ واٹر ٹریٹمینٹ کیتے جدید ٹیکنالوجی دے استعمال تے وی بریفنگ ݙتی ڳئی ۔ شرکا کوں جوڈیشل واٹر کمیشن ولوں انوائر نمنٹل پروٹیکشن ایجنسی کوں راوی سٹی منصوبے کیتے منظوری دے عمل کوں وختی مکمل کرݨ دی ہدایات بارے وی ݙسا ݙتا ڳئے۔شرکا کوں مقامی لوکاں کیتے راوی سٹی منصوبے دی افادیت دے حوالے بریفنگ ݙیندے ہوئیں ݙسایا ڳیا جو منصوبے اچ مقامی آبادی کیتے ملازمتاں دا کوٹہ مختص کیتا ڳئے ۔ ابتدائی طور تے ھک لکھ مقامی خانداناں کوں منصوبے توں روزگار دے موقع ملسن ۔
